Թողարկվել է մահացած ուղեղի վերականգնման նախագիծ. 1in.am

Բիոտեխնոլոգիական երկու ընկերություններ՝ ամերիկյան Bioquark Inc-ը և հնդկական Revita Life Sciences-ը, երկու երկրների իշխանություններից թույլտվություն են ստացել ուսումնասիրելու մարդկանց մահացած ճանաչված ուղեղը: Այս մասին հայտնում է BBC-ն:

Այդ նպատակով կընտրվի 20 մահ գրանցված մարկանց ուղեղ, որոնց կենսագործունեությունը կպահպանվի արհեստականորեն:

Նրանց ուղեղներում կներարկվեն ցողունային բջիջներ և նեյրոպեպտիդներ, նաև կօգտագործվի տրանսկրանիալ լազերային թերապիա և վերին վերջույթների էլեկտրանեյրոխթանում՝ մեթոդներ, որոնք արդեն ապացուցել են իրենց արդյունավետությունը կոմայի մեջ գտնվող հիվանդների դեպքում: Կուրսի ավարտից հետո հիվանդները հսկողության տակ կմնան մի քանի ամիս:

Օքսֆորդի համալսարանի նեյրոէթիկայի մասնագետ Անդերս Սանդբերգը BBC-ին տված հարցազրույցում մեկնաբանելով այս լուրը՝ նշել է, որ գլխավոր հարցն այն է, թե գիտնականներն ում կստանան հաջողության դեպքում՝ նույն հիվանդի՞ն, որը հայտնվել է վիրաբուժական սեղանին, թե՞ բոլորովին այլ անձի:

«Եթե ստացվի վերականգնել գիտակցությունը, ապա այն կարող է լինել ոչ այնքան նա, ով եղել է սկզբում, և այդ ժամանակ կարող է առաջանալ անհատականության վեճ»,- նշել է գիտնականը:

Հարցեր, պատասխաններ, մեկնաբանություններ